النصيحة من الدين

تمشيش تزلق بكلمة مش في بلاصتها ترصيلك تبحث وتبرر وتحلف بالايمانات اللى خلقها ربي الكل انك ما تقصدش غيرشي هكاكة زرفت من غير ما تشعر والا تشعر وماكش فايق عند روحك ، تمشيش تقول ، ليقولو عليك ماكش في المستوى متاع الانتظارات متاعهم ، تمشيشي هكة وانت غاصص بعبارة، والا هكة عندك جملة مفددتك وشاهى تنطقها تسيبها تسرح وتغفلك وتخرج ،لا عاد هكاك نهارك شام وخلات عليك ،
يا ويلك من البرانى اللى البره ومن البرانى اللى الداخل ومن الخيالات اللى ساكنة طاسة مخّك يجيووك في المنام ويعملولك استجواب عربي تنسى معاه اسمك ،
اى فمة استجواب عربي علاه مستغربين هوكا بالامارة فيه الذيب يسترنب ويسترنب مصطلح تقنى يحيل الى الارنب ، تمشيشي هكة ساعات ينقح عليك عرق الديمقراطية وتقول عندى موقف ، أه عندك موقف؟؟ ما تحشمش ؟؟ كبرت ولى عندك موقف ؟؟ وقتاش وليت عبد أنت حتى لين يولي عندك موقف ؟؟ عيب راهو في سبرنا ما نقولوش عندى موقف !!مش مليح ،، تمشيشي هكة ساعات تعدي نهار زاطل وتبدى عندك نحلة في مخّك تستجمع سجاعتك وتدلى برايك في الميضوع ؟؟ علاه واللجان المتناصفة اش نعملو بيهم ؟؟ولجنة الحي كواترو محطوطة ؟؟والغرف الفتيّة الكل اللى منشرة في البلاد نسكروها ؟؟ والجمعيات ولجان التنسيق ومراقبة الاسعار ومنتدى الحوار مع الشباب وجمعية الرفق بالحيوان اش نندبوا بيهم هاكم وقت ما انت يبدى عندك راى هكة وحدك وحدك لا طاح لا دزوه تدلى برايك ؟؟تمشيشي تقول باش نمارس حقوقي في المواطنة اللى يكفلهالى الدستور وتوخر وتقدم وتصوّت هكة تبدى تصوت وووه وووه اجرولي والا حتى بالمصري ميسالش اما بالتونسي احلى هانندبهم ها ها نسلتهم ها ها شومى ها ... صوّت على روحك لين تشبع حاجة اخرى ما تشقيش رويحتك توة انت تبدى قاعد في الدار اللى كاريها بشطر الشهرية وهارب من الملاك عندك زوز والا ثلاث شهر، قاعد قدام تلفزتك اللى شاريها بالكمبيالات وتتفرج في المسلسل العربي اعادة، والتلفزة حاطها بلا صوت لا يجي الملاك على غير راده ويسمعك في الدار ، تشرب في كاس تاى اخضر وتحسب في كرنى الكريدي متاع العطار وتكنبس كيفاش باش تلفق تخلصو هو و الجزار والخضار والكمبيالة وحانوت الفريب اللى شريت منو كبوط وباقي يسالك تفتوفة انت عاد قلنا تبدى قاعد هكاك والضوء طافي وتصوت بقدرة قدير وصوتك يبحاح زاده من المناشدة كان ما عجبكشي وتبعث جوابات شكر اسمك مقيّد فيها ، أسمع راهو مصلحتك فوق كل اعتبار انا نصحتك وانت عينيك فيك شاهد الله عليك
اى انستك بعقلك